Serbski muzej pśepšosyjo wjelgin wutšobnje
srjodu, dnja 22. maja 2024 zeger 6 wjacor
k 100. „Serbskemu blidoju“
do Chóśebuza, na Młyńskej droze 12.

tema:
„Kak glědaju wuknice a wukniki na to serbske pó abiturje na Dolnoserbskem gymnaziju?”
Gósć jo abiturientka Maja Melcherojc z Bórkow, zgromadnje z dalšnymi sobuwuknicami a sobuwuknikami Dolnoserbskego gymnazija. Wóni rozpšawiju wó dožywjenjach a nazgónjenjach ze šulskego wšednego dnja a w lichem casu.
Maja jo wótrosła w Žylowje w pólsko-serbskej familiji, źož jo se wobźěliła na Witaj-wucbje a jo pótom pśejšła na Dolnoserbski gymnazij. W lichem casu pišo za „Płomje” a „Nowy Casnik”. Wóna jo cłonk w Žylojskej młoźinje. Pó abiturje
planujo wukubłanje.

„Serbske blido“ jo załožyła kuratorka Christina Kliemowa w lěśe 2018, aby se w Serbskem muzeju forum w dolnoserbskej rěcy k aktualnym pšašanjam we a zwenka Łužyce póbitowało. Na to muzej wob lěto 6 razow pśepšosyjo. Kuždy raz stoj za zgromadne rozgrono wósebna tema w srjejźišću. Teke wob cas wobnowjenja Serbskego muzeja su se zajmce k tomu zmakali. Jano wob cas corony jo Serbske blido wupadnuło. Někotare zarědowanja smy teke digitalnje pśewjadli. Gósći su byli dotychněst wuznamne wósobiny z kultury, politiki, wědomnosći, znate maminorěcne wejsanarje, kenž se za serbsku rěc na wšakorakich pólach angažeruju, gósći z wukraja a młodostne z našych jsow.
Serbski muzej planujo tež w pśichodnem casu toś ten format serbskego rozgrona dalej wjasć. Wšykne zajmce su wutšobnje pśepšosone a dalšne ideje su rad witane.
Zastup jo darmo.
Zarědowanje wórmějo se w dolnoserbskej rěcy.