Mólowanje jatšownych jajkow jo woblubowana a lubowana serbska tradicija. Generacije serbskich familijow su toś ten nałog zachowali, dalej dawali a techniki dalej wuwijali.
Tak teke Hubert Bartsch, kenž jo južo w swójom źiśetstwje jatšowne jajka mólował a jo w běgu casa někotare techniki dalej wuwijał. Serbski muzej prezentěrujo jatšowne jajka mytowanego ludowego wuměłca. K prědnemu razoju su teke jaja kněza Bartscha wiźeś, nad kótarymi wón tśi techniki zjadnośijo.
We wustajeńcy zgóńśo teke, co wšykno pótrjebowaśo za mólowanje serbskich jatšownych jajkow. Póznawajśo techniki a testujśo swóju kreatiwnosć, sćerpnosć a preciznosć. Glědajśo z nami pśez kšomu tradicionelneje idylki a wótekšyjśo, kótare surowizny a industrije źinsa za serbskimi jatšownymi jajkami štyce.
W drugem źělu wustajeńce spěchujomy młodych wuměłcowkow a wuměłcow a prezentěrujomy jich mólbow! Źiśi z WITAJ-institutijach su za nas swóje ideje k jatšam na papjeru pśinjasli. Wósebny highlight twóri našo wjelicke jajko, źož jo serbska zgromadnosć pśepšosona, swóje mysli k pšašanju „Co wóznamjenijo za Was serbski byś?“ nam sobuźěliś.
Wótwórjenje wustajeńce wótmějo se dnja 29. februara 2024
zeger šesćich wótpołdnja. How pśedstajio wuměłc sebje a swóju twórbu. Musikaliski wobrubijo zarědowanje “Akordeonowy kwintet” konserwatorija Chóśebuz/Chóśebuz.
Dnja 9. a 10. měrca 2024 móźośo Huberta Bartša w našej wustajeńcowej źěłaŕni w Serbskem muzeju pśi źěle dožywiś. Pśecej wót zeger 14 – 17 móžośo jogo we wósebnej wustajeńcy zmakaś a jomu pśi pyšnjenju jatšownych jajkow pśiglědowaś.