05.06.2026
15:00
„Carna jaka – módra šorca“
Pśepšosenje na dwórowy swěźeń Serbskego muzeuma
Lube pśijaśele serbskeje kultury a rucnikaŕskego derbstwa,
Serbski muzej Was wutšobnje pśepšosyjo na naš dwórowy swěźeń! Swěśimy 5. junija 2026 zeger tśich wótpołdnja zgromadnje a mamy dwa wósebnej programowej wjeraška za Was pśigótowanej.
Módrośišć cora a źinsa
Daniel Häfner
Módrośišć – to wótemrějuce rucnikaŕstwo jo UNESCO-kulturne derbstwo cłowjestwa a namakajo se teke w našej serbskej drastwje. Z rědnym dłymokomódrym indigom se we Łužycy južo stolěśa dłujko barwi. Krotki pśednosk rozkładujo stawizny módrośišća. Pótom pśedstajaju se wšake mustry rozdźělnych drastwinych regionow. Dalej źo z aktualnymi wopytami, tu staru techniku zdźaržaś. Na pśikład źěłaju wšake luźe we Łužycy na tom, z digitalnymi metodami, ako 3D-śišćom, laserowanim a frezowanim, módrośišć w 21. stolěśu wužywaś. Pó pśednosku mógu se take źěła w małej wustajeńcy woglědaś a wutestowaś.
Muzikaliski pśinosk
Jake Schwarz spiwa w jadnorych słowach a weto dłymoko poetiski, w nimskej a serbskej rěcy, wó wšednem žywjenju. Mjazy melancholiju a rozglědniwym optimizmom pógibuju se jogo spiwy ako pśechójźowanja pó dešćowatych drogach, pśi kótarychž wóstanjoš naraz stojecy, dokulaž mysl se jawi. (Underdog Fanzine)
Mjazy pśinoskoma pśepšosujomy Was na spódobne zgromadne kafejpiśe ako teke na mały kulinariski pśikusk. Zastup jo dermo, jano za piśa a jězu pšosymy wó pósćenje, kótarež rad wužywamy k pódpěrje muzeja.
Wjaselimy se na rědny źeń połny kultury, tradicije a inowacije.
Z pśijaznym póstrowjenim
Spěchowańske towaristwo a team Serbskego muzeja
Projekt módrośišća spěchujo se wót
