Fotografiske drogowanje k błośańskim Serbam
Serbski muzej pokazujo wósebnu fotowu drogostku za Dolnu Łužycu: fotowy pókład z wěcej ako 200 głažkowymi negatiwami ze serbskimi motiwami, ako su wótmólowane w błośańskich jsach. Wóni su wót šotiskego inženjera, etnografa, fotografa a wuměłca Denisa Gallowaya (1878–1857), kenž jo pó słužbje pla wójakow ze swójeju kameru pśez rozdźělne regiony Europy drogował. Zachopił jo swójo drogowanje w Nimskej, w Dolnej Łužycy a Kulowje w casu mjazy 1908 a 1914. Pótom jo pśebywał w Nižozemskej (mj. dr. Zeelanźe) a pózdźej w Sedymgrodskej w Rumuńskej. Tamnemu etnografiskemu muzeju w Cluj-Napoca (RO) jo w lěśe 1950 wšykne swóje głažkowe negatiwy z etnografiskimi motiwami darił. Muzej jo dał fota scannowaś a wózjawiś w onlineportalu Europeana, kótaryž pó tej droze spśistupnijo zjawnosći toś te fota ako źěl europejskego kulturnego derbstwa. Serbski muzej pokazujo k prědnemu razoju wubrane serbske fota Denisa Gallowaya we wuśišću. Dajśo se sobu wześ na casowe drogowanje, glědajśo do woblicow tegdejšego casa, kenž su pregowane pśez wšedne źěło na póli, pśez dožywjenja na marku a wósebne wjeraški w žywjenju cłowjeka, ako na pś. swajźba. Woglědajśo sebje portrety źiśi a žeńskich z wšakorakimi drastwinymi wariantami, ako tak awtentiski jano rědko wiźeś su.